O Concello de Boiro leva a cabo durante o curso 2023/2024 accións formativas dirixidas a mellorar a cualificación de persoas desempregadas. O prazo de inscrición para participar nas formacións de Servizos de Bar e Cafetería e Atención Sociosanitaria a persoas no domicilio está aberto.
O curso de Servizos de Bar e Cafetería é de 658 horas de duración e impartirase no Centro de Formación e Viveiro de Empresas de Espiñeira entre o 15 de xaneiro e o 17 de xullo en horario de tardes de 15.00 a 20.00 horas.
A formación en Atención Sociosanitaria a persoas no domicilio é de 618 horas de duración e vaise impartir no mesmo centro, que conta con aulas homologadas para a formación práctica, entre o 22 de xaneiro ao 22 de xullo, en horario de 15.00 a 20.00 horas.
O obxectivo destas accións formativas, segundo informou o Concello, “é mellorar a cualificación profesional das persoas traballadoras e mellorar as competencias profesionais relacionas cos requirimentos de produtividade e competitividade das empresas, as necesidades de adaptación e cambios dos sectores produtivos e á inserción laboral”.
En ambos os dous cursos vaise desenvolver un módulo transversal de Inserción laboral, sensibilización ambiental e na igualdade de xénero, un módulo formativo sobre igualade de oportunidades entre homes e mulleres e sobre corresponsabilidade familiar e doméstica. Ademais, todas as accións formativas contan con prácticas profesionais non laborais en empresas.
As inscricións están abertas e toda a información sobre as formacións na web municipal, www.boiro.gal, ou no Departamento de Emprego, accesible a través do enderezo electrónico emprego@boiro.gal ou o teléfono 981 84 26 09.
