O Concello de Boiro desenvolve un curso de atención sociosanitaria a persoas no domicilio de nivel 2. O curso comezará o vindeiro 22 de xaneiro e as inscricións para participar están xa abertas, segundo confirmou o Concello.
A formación vaise levar a cabo nas instalacións municipais no Centro de Formación e Viveiro de Empresas de Espiñeira, entre o 22 de xaneiro e o 22 de xullo de 2024 en horario de tarde, de luns a venres de 15.00 a 20.00 horas.
Este curso de nivel 2 está destinado a persoas que desexan ampliar os seus coñecementos e obter unha titulación no ámbito sociosanitario. Os requisitos para poder participar son contar con estudos de nivel ESO, competencias clave nivel 2 ou dispor dun certificado de profesionalidade da mesma familia nivel 1.
Este é o terceiro dos cursos AFD que o Concello de Boiro desenvolve na anualidade 2023-2024. Para o curso de Servizos de Bar e Cafetería que comeza o vindeiro 2 de xaneiro aínda hai prazas dispoñíbeis e as inscricións poden facerse ata o vindeiro 29 de decembro.
As inscricións para as accións formativas e toda a información sobre os cursos está dispoñible do Departamento de Emprego do Concello de Boiro mediante o enderezo electrónico emprego@boiro.org ou o teléfono 981 84 26 09.
