A Consellería de Promoción do Emprego e Igualdade da Xunta de Galicia concedeu unha subvención de preto de 400.000 e euros ao Concello de Rianxo para o desenvolvemento do Obradoiro Dual de Emprego Monte Noso, impulsado dende o dito departamento para complementar o importante labor de promoción laboral do Obradoiro Pazo de Rianxiño, tamén en activo. O novo obradoiro irá destinado a 15 alumnos/as-traballadores/as, con contratos de formación dunha duración de 12 meses e o seu correspondente profesorado. Estará centrado nas repoboacións forestais e tratamentos silvícolas e en actividades auxiliares en conservación e mellora de montes.
En vindeiras datas aprobaranse as bases de selección e publicaranse as diferentes convocatorias de selección do persoal de formación e de solicitudes do alumnado, onde se establecerán os prazos e requisitos para a inscrición.
O proceso de selección farase a través da Oficina de Emprego de Boiro, co cal é necesario que as persoas interesadas sexan desempregadas e estean inscritas como demandante de emprego na Oficina de Emprego de Boiro.
Os traballos previstos abranguerán as actividades necesarias para o establecemento de plantas arbóreas do tipo de frondosas autóctonas, reposición de plantas danadas ou mortas, rozas manuais e mecanizada, rareo de arborado, podas, corta de invasoras, control de pragas e enfermidades, tratamentos fitocidas, mantemento de vías forestais (limpeza de gabias…), entre outros.
Temos toda a información precisa na páxina web do Concello de Rianxo.
Como dixemos, esta nova iniciativa de emprego únese á que focalizou a súa actividade no Pazo de Rianxiño, impulsada tamén dende o Concello, desta volta centrada en xardinaría e traballos de acondicionamento.
