O Goberno español solicitou da Comisión Europea a aplicación dun PERTE (Proxecto Estratéxico de Recuperación e Transformación Económica) para o sector pesqueiro, co obxectivo de incentivar a economía deste sector clave para Galicia, entre outros territorios.
Así o trasladou este martes, en Vigo, a directora xeral de Pesca Sostible, Mónica Corrales, durante o acto inaugural da feira mundial CONXEMAR, que reúne no recinto feiral da cidade olívica máis de 750 empresas de 45 países que ocupan 370.000 m2. de superficie expositiva que se espera visiten non menos de 26.000 profesionais chegados dos cinco continentes.
No mesmo acto reclamóuse a aplicación da baixada do IVE aos produtos do mar, que permita que a industria de transformación pesqueira poda acollerse ás axudas europeas, como reclama o sector, e unha lexislación europea que teña en conta a sostibilidade do sector tanto no ámbito medioambiental como social e económico.
Outro dos pronunciamentos realizados nese acto foi o relacionado co regulamento europeo sobre a pesca de fondo, abordado polo alcalde de Vigo, Abel Caballero, que reivindicou que as normativas deben estar amparadas en datos científicos, non como no caso da aplicación desa norma tan negativa para o sector pesqueiro galego.
Nesta XXIV edición da Feira Internacional de Produtos do Mar Conxelados que se clausurará este xoves, 5 de outubro, queda unha firme esperanza sobre a posibilidade de que a UE aprobe o mecanismo de financiamento que é o ERTE e que, dun ou doutro xeito, pode contribuir a mellorar a situación dos maioristas, importadores, exportadores, transformadores, fabricantes, distribuidores, frigoríficos. maquinaria, industria auxiliar, etc., participantes nesta feira que é considerada como unha das máis importantes do mundo no seu ámbito e que acada nesta edición unha participación récord de expositores nos seus vinte e catro anos de existencia.
