Coa finalidade de garantir a seguridade no desenvolvemento da VI Subida á Curota que terá lugar no 7 de outubro, efectuaranse dous cambios no que respecta á circulación.
O carril na dirección a Ribeira da AC-302 permanecerá cortado dende as 16.30 ata as 20.30 horas. Tampouco se permitirá o tráfico durante ese período na estrada da subida á Curota dende Moldes (DP-6705).
A Subida á Curota reúne a modalidade de atletismo (carreira a pé) que abrangue da categoría sub-18 ata a máster; e a de ciclismo, que se divide do seguinte xeito: BTT (máster 30, máster 40 e máster 50) e bicicletas de estrada (cadete, júnior, sub-23, elite, máster 30, máster 40 e máster 50).
Trátase dunha proba que estima a participación de máis de 200 deportistas que deberán completar unha distancia de 9 quilómetros nun circuíto que ten como lugar de saída a praza Alcalde Segundo Durán e a meta na Curota.
