O concello de Outes vai acoller no Centro Social unha nova edición das Xornadas Sociosanitarias (convocatoria XVIII) que organizan José Dios Diz, médico local de Atención Primaria e o Centro de Saúde, o Concello, a asociación ADISBISMUR, e a USC, entre outras entidades. A nova edición celebrarase entre outubro deste ano e maio do seguinte, o último xoves de cada mes ás 18.30 horas. O programa vén composto de sete conferencias-coloquio, coordinadas polo doutor Xosé María Dios Diz.
A axenda comeza este 26 de outubro coa charla Enfermidades crónicas: HTA diabetes, artrose… tratamentos actuais e seguimento, a cargo de Antonio Pose Reino, doutor de Medicina Interna do Complexo Hospitalario Universitario de Santiago (CHUS).
As actividades proseguirán o 30 de novembro, con Situacións de emerxencia e como actuar, charla impartida por Isabel Moares Rei, traballadora do Servizo de Emerxencias 112.
O 14 de decembro volven as actividades de divulgación con Economía e saúde, a cargo de Adrián Dios Vicente, doutor en Económicas.
Os relatorios proseguen o 29 de febreiro de 2024 con O exceso de radon e a súa prevención, a cargo de Alberto Ruano Raviña, doutor de Medicina Preventiva – Máster de Saúde de Pública da USC.
O 21 de marzo será a quenda de Luis Mayo Suárez, que falará do Coñecemento da poboación dos efectos do radon na saúde. Luis Mayo é licenciado en Medicina e Cirurxía, amais de alumno do TFG.
O 17 de abril, Miguel Vázquez Vázquez, especialista en Xeriatría e Xerontoloxía Social e director de CALIGERS, impartirá a charla Soidade na idade adulta. Estratexias preventivas e alternativas de vida para a vellez.
As xornadas rematarán o 30 de maio, con Saúde mental: saber pedir axuda, a cargo de Rosa Cerqueiro Landín, psicóloga do Complexo Universitario de Conxo.
