Este mércores 13 de setembro o concelleiro de Benestar de Outes, José Antonio Caamaño, e o alcalde, Manuel González, visitaron ao alumnado do termo municipal que fai uso do servizo de madrugadores, prestado polo Concello. Trátase, explicaron, dun servizo no que este ano hai inscritos 48 nenas e nenos, e que “é moi demandado sobre todo durante a campaña marisqueira”, para facilitar a conciliación familiar dos homes e mulleres que traballan nesta actividade laboral.
O servizo de madrugadores é un servizo de acollida e coidado no que os menores poden almorzar. Lévase a cabo durante todo período lectivo, en horario de 7:50 h da mañá ata o inicio das clases.
