Este venres 21 de xullo comezaron en Rianxo as obras para o cambio da cuberta do Pavillón Municipal José Manuel Abuín “Chema”. Os traballos que arrincaron este venres veñen cun orzamento de 171.432,87 euros.
Con esta actuación o Concello pretende dar continuidade ao labor xa desenvolvido para eliminar as filtracións e mellorar a eficiencia enerxética, labor que puxo o foco na fachada sur do inmóbel (instalando un illamento SATE de 60 mm que facilita a impermeabilización) e que incluíu un orzamento total de 36.574,46 euros.
Todas estas actuacións forman parte dun proxecto máis completo que irá poñendo ao día estas instalacións municipais en sucesivas fases que se iniciaron o verán do ano pasado resolvendo o illamento da fachada máis exposta á chuvia.
