J.C.- A saída na enseada do Caramiñal, enfronte á praia do Areal, foi moi pelexada polo lado do comité de regatas, con algún que outro toque entre embarcacións que buscaban a mellor das posicións, incluso un fóra de liña do Bonn III, que a pesar de ter que volver á zona de pre-saída realizaba unha espectacular cinguida que lle facía chegar en primeira posición á baliza de desmarque.
A partir de aí, cun vento duns 10-12 nós, os barcos percorreron millas con spinnakers izados ata a illa de Ons. Ao virar no sur de Onza a frota atopouse cun nordeste moi racheado, que en momentos chegou a superar os 25 nós e que fixo que os máis pequenos de frota pasasen algúns momentos de apuro.
Xa entrando de volta na ría o vento amainaba por momentos, o que fixo que parte da frota se dese aprupado. Finalmente, o vento volveu aparecer con gran intensidade para facer que todos os barcos entrasen en meta sen dificultades.
O máximo favorito á vitoria na clase regata, o Bonn III de Víctor Carrión, demostrou que lle ten collida a medida a esta proba e do mesmo xeito que na anterior edición levouse a vitoria final por diante do Santana ́s, do Real Club de Regatas Galicia e do local Chispetrén, de Jesús Iglesias.
Na clase cruceiro-regata, unha vez máis e xa van unhas cantas, José Manuel Pombar e o seu inseparable Cámping Ría de Arousa levouse para as súas vitrinas o Faro de Ons que o acredita como o vencedor desta clase. Segundo posto para o Nahela de Víctor Manuel Álvarez, do CD Alagua da Guarda e terceira posición para un Alpha, de Manuel Nieto, que realizou unha moi boa regata deixando pola popa a embarcacións a priori favoritas como o Ziralla ou o Ronautica Mariñas.
Outro dos favoritos, o Orlando, do Ro Yacht Club, non defraudou e fíxose co primeiro posto na clase cruceiro. Segundo posto para un sorprendente Mauritania, que a pesar de sufrir nas últimas millas a causa da baixada do vento, realizou unha primeira parte de regata sobresaliente e iso valeulle para deixar no terceiro caixón do podio ao Thor II de Guillermo Varela, do CN Arousa Norte.
Ao finalizar a regata celebrouse a entrega de trofeos nas instalacións da Mariña de APobra onde a organización, despois de citarse con todos os participantes para a seguinte edición, agradeceu o apoio dos patrocinadores Clínica Dental Gonzalo Lopez Castro e Atlantic Dental Institute, así como de todos os socios do CN Arousa Norte sen os cales non se podería celebrar esta clásica proba do calendario cruceirista galego.
