Alemaña vén de estabelecer o chamado “Deutschlandticket”, unha iniciativa coa que tenta apoiar á poboación fronte a inflación, ao tempo que promove o uso dun transporte menos contaminante.
Deste xeito, os residentes en Alemaña poden viaxar por 49 euros ao mes, grazas a un billete de transporte válido desde o pasado día 1 de maio que, por custo e efectividade do dispositivo, significa unha verdadeira “revolución”. Este billete permite o acceso ilimitado a todo tipo de transporte, agás os trens de alta velocidade, unha aposta polo clima e o poder adquisitivo que pasa agora as primeiras probas.
O acceso é ilimitado a autobuses locais e rexionais, metros, trens locais e rexionais e significa, segundo o ministro de Transportes alemán, “a reforma do transporte máis importante da historia”.
A Asociación Alemaña do Transporte Público (VDV) esperan “polo menos ” 16 millóns de futuros abonados nun país de 84 millóns de habitantes. Xa se venderon perto dun millón de billetes e non fai máis que comezar a experiencia.
O financiamento do sistema corre a cargo das rexións e o Estado, que pagarán cada un 1,5 millóns de euros anuais.
A medida, acollida con satisfacción e responsabilidade pola cidadanía alemá, contrasta co sucedido en España onde, como é sabido, a gratuidade dos servizos ferroviarios de proximidade e rexionais para traballadores e estudantes é total, e os servizos de trasporte público por estrada teñen unha importante redución no prezo. Galicia é, neste caso, unha das autonomías máis beneficiadas, polas aportacións económicas para este fin outorgadas polo Goberno, a Xunta, algúns concellos e unha entidade bancaria. A acollida a estas medidas foi boa, especialmente no transporte de proximidade por estrada, pero a actitude de supostos usuarios de transporte ferroviario reservando prazas para se desprazar en días e horas punta sen usar os devanditos servizos falan moi pouco a prol das responsabilidades que competen a aqueles que coa súa actitude prexudican de tgs. xeito aos que si queren beneficiarse duns servizos que tamén pretenden influír no poder adquisitivo dos usuarios.
