Máis de 2.000 persoas -segundo os convocantes- acadaron este domingo o obxectivo de rodear o edificio administrativo da Xunta en San Caetano, na capital de Galicia. O mal tempo non impediu que se acadara, con creces, cumprir o reto marcado pola Coordinadora “Eólica Así Non”. Rodear a Xunta, din os convocantes, “como a Xunta pretende rodear aos galegos e galegas con parques e infraestruturas eólicas”.
Rexeitan os máis de 75 macroproxectos eólicos que serán autorizados esta semana posiblemente en toda Galicia, “provocando danos irreparables no conxunto do país”.
Os manifestantes reclamaron unha transición enerxética xusta e sustentábel e non a costa de todo. Demandan da Xunta unha planificación enerxética ordenada e ao servizo do pobo, a ampliación da rede de espazos naturais protexidos e a restitución dos dereitos de participación pública nos procesos de autorización.
Advirten que os danos da aprobación desta “enxurrada” de proxectos eólicos poden ser irresponsables, tanto ambiental como socialmente.
