A Casa da Cultura de Boiro vai acoller este venres 21 de abril, ás 20.00 horas, a representación dunha peza de teatro para a rapazada. Falamos da función Hugo (ser diferentes fainos grandes), a cargo da compañía teatral Os Náufragos e dirixida ao público infantil e familiar. As entradas poderán adquirirse dende unha hora antes da función na billeteira.
Hugo é unha peza teatral que nos adentra no trastorno do espectro autista (TEA). Foi recoñecida co Premio María Casares ao mellor espectáculo para o público infantil e familiar.
Sinopse
Hugo é diferente. Gústanlle moito os avións e tamén toca o piano. Laia visita a Hugo cada día. A Laia gústanlle falar e as plantas. Hugo ten TEA, trastorno do espectro autista. A función Hugo fala da empatía, da necesidade de comunicarnos e da beleza da diferencia. Ser diferentes fainos grandes.
