O salón de plenos da Casa Consistorial de Boiro acolleu este martes 4 de abril, data do aniversario do nacemento de Ramón Martínez López, un acto en homenaxe á súa figura. Na xornada participaron o alcalde José Ramón Romero, a concelleira de Memoria Histórica, Dores Torrado; a presidenta do Padroado do Museo do Pobo Galego, Concha Losada; e o biógrafo de Martínez López, Amancio Liñares, entre outros representantes da cultura e da política. “Ramón Martínez López foi un referente do galeguismo e un boirense que debe ser recordado e homenaxeado”, afirmou o alcalde, José Ramón Romero, durante o acto en recoñecemento no que tamén participou a filla de Martínez López, Maribel Martínez.
Este acto en homenaxe forma parte dos actos que o Concello de Boiro leva a cabo neste ano para a conmemorar o centenario do Seminario de Estudos Galegos.
Ademais, durante o desenvolvemento do acto descubriuse unha placa no lugar no que naceu Ramón Martínez López, na zona de Cimadevila, no marco dun programa de actividades que se desenvolveron para poñer en valor o barrio. “Boiro ten memoria, ten historia e ten a Ramón Martínez López”, afirmou a concelleira de Memoria Histórica, Dores Torrado.
O acto contou coa intervención de Amancio Liñares, que evocou a figura de Martínez López, facendo especial fincapé na súa traxectoria a prol da cultura galega e, especialmente, a súa vinculación con Boiro. A xornada continuou cunha visita teatralizada realizada polos Quinquilláns ata a zona de Cimadevila onde finalmente se descubriu o panel en homenaxe a Ramón Martínez López no lugar no que naceu.
