O Concello da Pobra do Caramiñal habilitou no paseo do Xobre, na contorna da praia canina, un novo servizo municipal que pon o foco nas mascotas da cidadanía e dos visitantes e na súa calidade de vida: o primeiro parque canino do termo municipal.
Consta dun circuíto de axilidade composto por seis xogos do cal poden desfrutar as mascotas e un peche perimetral para evitar que escapen. Tamén hai un taboleiro coas normas por seguir para facer un bo uso do espazo. A concelleira do Benestar Animal, Estefanía Ramos (Nós Pobra), explica que se construíu co remanente da Tesouraría de 2021, por un importe de 12 000 euros.
Doutra banda, o alcalde, Xosé Lois Piñeiro (Nós Pobra), apuntou que se lle dá así resposta a unha demanda veciñal que permite exercitar os cans ao tempo que establece un punto de encontro no cal poidan interactuar.
