A estatua de Valle-Inclán na Alameda luciu onte de novo a bufanda vermella coa que a Fundación Granell, en colaboración co Museo Valle-Inclán de Pobra do Caramiñal, celebra desde o 2007 a volta do escritor arousán a Santiago e Galicia.
O acto de colocación da bufanda reuniu aos seus representantes, a un neto do dramaturgo, ao secretario xeral de Cultura, ao director do Museo Valle-Inclán da Pobra, ao alcalde de Santiago e a membros da corporación compostelá e membros do Foro Valle-Inclán.
O acto como é habitual celebrouse no compostelán paseo da Ferradura de Santiago onde se atopa a imaxe de Valle sentado mirando á catedral de Compostela.
Durante o acto, léronse unha vintena de fragmentos de obras de Valle relacionados coa capital galega e un máis, adicional, escrito por Castelao; unha peza do ano 1939 na que o intelectual galeguista fai referencia ao enterro do escritor de Arousa. “Eu sei que Don Ramón morreu. Vin o seu cadáver. Leveino a enterrar. Leveino sobre os ombreiros nunha tarde chuviosa de inverno. Xamais o ceo de Compostela chorara tanto! E vino descender ás entrañas da terra nai (…) Desapareceu e enterrámolo nun cemiterio novo e baleiro, que agora está cheo de defuntos”, deixou escrito o político de Rianxo sobre Valle Inclán, segundo leu o director do Museo Valle-Inclán da Pobra do Caramiñal, Antonio González Millán.
González Millán congratulouse de que este acto sirva ano tras ano para “manter viva a semente de Valle na capital cultural” de Galicia e avogou por retomar tanto o roteiro literario do escritor, así como por representar, “por fin”, a obra A miña irmá Antonia, escrita en 1909 polo autor de Luces de Bohemia e que se desenvolve integramente polas rúas de Santiago de Compostela. Durante o acto, unha das participantes, Goretti Sanmartín, concelleiro do BNG na cidade, aproveitou a súa quenda de lectura para lembrar ao poeta e académico Salvador García Bodaño, falecido este martes na capital galega.
