Galiza Nova presentou este primeiro de marzo os detalles da XXIII edición das Xornadas da Historia de Galiza, que se van celebrar en Rianxo os días 17, 18 e 19 de marzo. O alicerce temático desta nova convocatoria será a historia do movemento nacionalista galego. A secretaria xeral de Galiza Nova, Marta Gómez, lanzou un convite á mocidade galega para participar nas palestras que se impartirán neses días no Pazo de Rianxiño.
A organización xuvenil do BNG elixiu o concello de Rianxo pola súa vinculación coa figura de Castelao, “Castelao é un dos pais do nacionalismo galego tal e como o entendemos hoxe en día, por iso eliximos a vila que o viu nacer para desenvolver estas xornadas formativas” sinalou Gómez, engadindo que as xornadas darán comezo o venres ás sete da tarde cun relatorio sobre o nacionalismo galego que impartirá a deputada do BNG no parlamento galego Olalla Rodil, e continuarán o sábado con diferentes palestras que abordarán a historia do movemento nacionalista e terán a súa clausura o domingo a medio día tras a proxección do documental sobre os 20 anos da catástrofe do Prestige.
Durante a tarde do sábado as mozas e mozos da organización realizarán tamén un roteiro pola vila que impartirá Adolfo Muíños, alcalde rianxeiro, quen sinalou na presentación das xornadas que “para nós é un orgullo que as mozas e mozos de Galiza Nova veñan facer estas xornadas na nosa vila, que foi berce de Castelao, e que sigan formándose e aprendendo sobre nacionalismo galego nun momento tan importante”.
Marta Gómez engadiu que a intención é “animar a toda a mocidade a participar esa fin de semana con nós en Rianxo”. E apuntou: “As xornadas son unha oportunidade para formarse e para aprender, mais tamén son un bo espazo para o convivio e para coñecer a realidade das mozas e mozos de distintas zonas do país, por iso creo que calquera persoa que teña interese debería achegarse sen medo”.
As xornadas son abertas a todas as persoas de entre 15 e 30 anos que queiran participar delas, mais deberán facer unha inscrición previa en liña a través dun formulario que se atopa tanto na web como nas redes sociais da propia organización xuvenil.
Programa de actividades
Venres, 17
19:00h. Benvida e presentación das Xornadas.
19:30h. “Nacionalismo galego para dummies“, con Olalla Rodil.
21:30h. Cea.
22:30h. Proxección do documental “Setembro 1972 – Unha folga que mudou a nación”.
Sábado, 18
09:00h. Almorzo.
10:30h. “O pensamento crítico de Castelao”.
12:00h. Pausa.
12:30h. “Nacionalismo galego dende os anos 60 ata os 90”, con Manuel Mera.
14:30h. Xantar.
16:30h. Coñecemento da contorna. Roteiro pola vila de Rianxo.
19:00h. “Nacionalismo galego na actualidade”.
21:30h. Cea e foliada.
Domingo, 19
09:30h. Almorzo
11:00h. Proxección do documental “20 anos de dignidade”.
12:00h. Mesa redonda: “Nacionalismo galego: a autoorganización como piar fundamental”, con Bieto Lobeira.
14:30h. Xantar.
16:30h. “O papel de Galiza Nova na loita pola República Galega”.
17:30h. Clausura das Xornadas.
