O Centro Dramático Galego, a través do seu Plan de Mobilidade, proporcionará medios de transporte aos concellos da nosa comarca para permitir que os afeccionados ás artes escénicas poidan acudir ás súas representacións en Santiago. O plan, do que xa puideron gozar veciños e veciñas de Rianxo, Boiro e Ribeira en anteriores representacións do CDG, seguirá activo para o seu novo espectáculo, Shakespeare en Roma, co-dirixido por Quico Cadaval (Ribeira, 1960).
O bus terá saída de Ribeira o vindeiro 22 de marzo ás 17.00 horas. A actividade terá un prezo de 3 euros que inclúen transporte e billete para o teatro (o importe abonarase na billeteira en Compostela).
Como dixemos, a obra seleccionada é Shakespeare en Roma, unha representación composta de catro pezas coas que o autor achegouse ó mundo dos clásicos: Tito Andrónico, dirixida por Quico Cadaval, Xulio César, dirixida por María Barcala e Xúlio Lago, Antonio e Cleopatra, por Sara Rey, e Coroliano, dirixida por Rui Madeira.
A través destas versións condensadas en 35 minutos os directores e directoras pretenden compartir co público de hoxe a reescrita dos textos shakespearianos ao tempo que poñen o foco nalgunha das personaxes secundarias presentes nos orixinais.
Pódese reservar praza enviando un correo co nome, apelidos e un teléfono da persoa interesada ao enderezo normalización@ribeira.gal ou no teléfono 981 835 65, de luns a venres, de 9.00 a 14.00 horas.
