O Concello da Pobra do Caramiñal renovou parte do material do local de ensaio situado no Camiño Ancho, ademais de actualizar o estudio de gravación. Para tal fin, adquiriuse novo equipamento: micrófonos, auriculares, soportes…
O investimento achégase aos 5 000 euros e busca, nas palabras do concelleiro da Mocidade, José Andrés Lojo (Nós Pobra), apoiar a creación artística e incorporar as propostas efectuadas polas persoas usuarias nunha asemblea. Neste senso tamén se pronunciou a concelleira dos Servizos Municipais, Estefanía Ramos (Nós Pobra), quen ratificou o compromiso da Administración local coas distintas agrupacións que fan uso da instalación: Caras B, Moito!, música tradicional, coro…
Segundo lembraron os concelleiros, para facer uso deste local é preciso cubrir a solicitude pertinente no Consistorio e efectuar a reserva para ensaiar cando sexa necesario.
