Boiro vai conmemorar este sábado 4 de febreiro o Día Mundial do Cancro. Farao na rúa peonil, diante do Mercado Municipal, a partir das 12.00 horas, coa creación dun lazo humano e a lectura dun manifesto. O acto está organizado pola xunta local da Asociación Española Contra o Cancro de Boiro. O lazo humano, explican as persoas integrantes da dita xunta local, será unha mostra de apoio aos pacientes e familias que se enfrontan a esta enfermidade. Comezará como dixemos ás 12.00 horas na rúa peonil, diante do Mercado Municipal. A iniciativa de Boiro repetirase de xeito simultáneo en diferentes puntos da provincia da Coruña. Están convidadas a participar todas as persoas que desexen sumarse á loita contra esta doenza. A celebración de Boiro complementarase coa importante axenda de actividades que prepara a mesa local da AECC en Ribeira, da que dimos conta dos días pasados.
