O salón FITUR, a Feira Internacional de Turismo que se celebra en Madrid até este domingo 22 de xaneiro, acolleu a charla Gastronomía da Ría de Muros-Noia, sustentábel por natureza dentro das presentacións da programación de Galicia, que se levaron a cabo no salón.
O delegado territorial da Xunta na Coruña, Gonzalo Trenor, foi un dos participantes da charla. Trenor destacou que “Galicia superou cun gran éxito a celebración do Xacobeo 21-22 froito da nosa versión máis galega da prudencia e da sensatez e nese éxito xogou una papel fundamental a provincia da Coruña porque foi a que liderou este espectacular ano”. Neste senso, sinalou que 2a innovación, a calidade e a excelencia teñen que seguir sendo a folla de ruta para consolidar as boas cifras do ano pasado en Galicia e máis concretamente nesta comarca”.
Trenor puxo en valor “o excelente traballo dos alcaldes e de todo o equipo do xeodestino Muros-Noia” e en relación coas súas potencialidades turísticas destacou que “a mellor definición sería unha Galicia en pequeno dentro dunha Galicia máis grande, porque este espazo ten todo para extractar nunha soa viaxe a esencia da nosa comunidade, por exemplo praias espectaculares, paisaxes únicas, unha gran riqueza histórica chea de cultura e tradicións, unido a unha excelente gastronomía”. Todo isto, dixo, fai que “cada ano sexan máis os turistas que se animan a descubrir este espazo do sur da nosa provincia”. Trenor animou aos Concellos da comarca a “seguir traballando como ata agora apostando por novas estratexias que permitan que este territorio avance no camiño da sustentabilidade e da mellora da competitividade turística”.
Terras de Compostela
O representante do Goberno autonómico tamén participou na presentación Terras de Compostela-turismo natural. Trenor destacou que “este xeodestino é un dos destinos culturais máis relevantes de Galicia polo gran significado que ten o paso das oito variantes do Camiño Santiago, o que forma da esencia de cada un dos seus concellos e da oferta turística que ofrecen”
Trenor recalcou ademais que “Terras de Compostela perfílase como o destino ideal para o turismo natural e rural que cada ano gaña máis adeptos” e destacou especialmente o esforzo que está facendo este GDR en materia de formación para oferecer tamén un destino turístico de calidade.
