A Federación de Asociacións de Alfombristas Galegos de Arte Efémera ( FAGAARTE) presentouse oficialmente en Santiago. O obxectivo é poñer en valor o labor dos alfombristas e garantir o futuro desta tradición en Galicia. A federación está integrada por colectivos de Rianxo, Bueu, Moaña, Ponteareas e Ames, aínda que hai outras agrupacións que tamén mostraron o seu interese en adherirse.
A nova federación terá a súa sede en Bueu e o seu presidente será Manuel Alonso, directivo da asociación de alfombristas da localidade do Morrazo. No acto de presentación de hoxe había representantes institucionais, como o alcalde de Santiago, Xosé Sánchez Bugallo, e desde Cataluña desprazouse a presidenta da Coordinadora Internacional de Entidades Alfombristas de Arte Efémera, Vicenta Pallarés. O presidente de FAGAARTE avanzou que parten dun obxectivo irrenunciable, a unión de todos os alfombristas galegos. A asociación quere atraer aos máis novos a través de talleres e fomentando a súa creatividade artística a través do alfombrismo. Un dos esforzos da federación será o da difusión e visibilización do traballo dos alfombristas.
FAGAARTE organizará conferencias informativas en Pontevedra e Santiago, unha exposición fotográfica e talleres formativos entre febreiro e marzo de 2020. Os alfombristas galegos traballan desde hai tempo con outras asociacións para que a arte efémera sexa declarado no futuro como Patrimonio Cultural Inmaterial da Humanidade por parte da Unesco.
