No serán deste primeiro de decembro presentouse en Santiago a versión en galego de A miña irmá Antonia, obra literaria de Ramón María del Valle-Inclán, traducida por vez primeira ao galego por Rocio Viéitez co apoio do Concello da Pobra do Caramiñal, do Museo Valle-Inclán (A Pobra) e da Secretaría Xeral de Política Lingüística. No acto, no que participaron representantes das dúas institucións da nosa comarca e da Secretaría Xeral de Política Lingüística, (Valentín García), fíxose saber que o volume complétase coas fotografías de Santiago de Compostela realizadas por Adolfo Enríquez e a edición facsimilar do orixinal.
Na cita, fíxose fincapé na necesidade de reivindicar o galego en todas as obras relevantes da literatura universal. Así se manifestou Valentín García, engadindo que Valle-Inclán “é un autor orixinal e innovador, dunha calidade extraordinaria, cuxa obra acáelle especialmente ben á lingua galega, por dicilo dalgún xeito, pois, á fin, a ambientación, a cultura, o pensamento, o sentimento e moitos aspectos expresivos que teñen detrás moitos dos seus orixinais en castelán xa teñen a Galicia e á súa lingua como pano de fondo”.
Canda Valentín García tamén participaron neste acto, que acolleu o Centro Internacional de Prensa de Galicia, Xaquín del Valle-Inclán, neto do escritor e autor do prólogo; Antonio González Millán, director do museo pobrense e coordinador da publicación; Rocío Viéitez, autora da tradución, e Adolfo Enríquez, fotógrafo e editor da obra. Ademais, a presentación estivo amenizada por unha pequena representación do texto da man do actor Roberto Leal e a actriz Gloria Rico.
A miña irmá Antonia apareceu por primeira vez no volume Cofre de sándalo en 1909 co engadido Obras completas de Valle-Inclán. Tomo I. Ambientada nas rúas de Santiago de principios do século XX, Valle-Inclán inspirouse na Casa do Cabido para escribir esta historia de misterio que narra a vinganza do estudante Máximo Bertal, namorado de Antonia a rexeitado pola súa nai.
