Prosegue este mes de marzo o libro de novidades de Porto do Son en materia de infraestruturas e melloras urbanas e rurais, logo do intenso traballo despregado para devolver, na explanada do porto, o mar á veciñanza. Entre o máis destacado deste compendio de novidades figuran sen dúbida os equipamentos de lecer habilitados en Santa Irene: dous miradoiros cunhas impresionantes vistas á ría de Muros e Noia e máis un parladoiro que recupera a estrutura dos puntos de encontro tradicionais existentes na vila sonense e noutras localidades da nosa contorna.
Segundo puidemos saber, os traballos supuxeron un investimento de 165.147€ (financiados a través dunha subvención da Consellería de Medio Ambiente), habilitando tamén unha área de estacionamento para que veciños e visitantes desfruten ao máximo destes novos outeiros sobre a ría. Os traballos, que rematarán ao longo destes días, abeiráronse ao plan de humanización de espazos públicos impulsado polo Concello. As obras puxeron o foco tamén na accesibilidade, substituíndo o aglomerado asfáltico previo por unha plataforma única na que se dá prioridade ao tránsito peonil (posibilitando o paso de vehículos nunha soa dirección).
