Este luns 31 de xaneiro celebrouse o pleno da Mancomunidade de Municipios Barbanza Arousa na sala de xuntas do Consistorio de Boiro. A sesión serviu para formalizar o cambio de presidencia e traspaso de poderes (o primeiro punto da orde do día), unha remuda que se celebra con periodicidade anual e que desta volta sáldase con Xosé Lois Piñeiro, alcalde da Pobra do Caramiñal, ocupando o máximo posto de responsabilidade na entidade. Substitúe no seu cargo a Adolfo Muíños, rexedor de Rianxo, quen á súa vez revelou o ano anterior a Manuel Ruiz, alcalde de Ribeira.
Durante a sesión plenaria, Piñeiro e Muíños destacaron “a boa sintonía” e “a colaboración que existe entre o catro concellos da Mancomunidade” para levar a cabo a estratexia do destino turístico. Esta estratexia, sinalaron, seguirá a liña que xa viña traballando, baseada na ría de Arousa e a serra do Barbanza como “eixos diferenciadores” e “co Camiño de Santiago por terra e por mar como produtos principais”. Os alcaldes tamén salientaron os relevantes avances de promoción dados a prol do Camiño de Santiago A Orixe, coa definición e o trackeado do percorrido, a delimitación do mesmo, a panelización, a creación de materiais promocionais e a súa sinalización. Para este ano a Mancomunidade afondará na difusión entre os mercados potenciais, seguindo coa promoción dos máis de 60 paquetes turísticos creados ao redor de diferentes temáticas así como a creación de novas experiencias no territorio.
Continuarase, así mesmo, potenciando a colaboración público-privada e o traballo co sector a través da Comisión de Turismo e Comercio.
