A Asociación Ambar de persoas con diversidades funcionais e cognitivas quixo celebrar a chegada do aninovo relembrando as súas orixes e facendo balance do seu importante traballo de integración ao longo das pasadas décadas. Fíxoo publicando un vídeo nas redes sociais que amais de servir para conmemorar os corenta anos de andaina da asociación do Barbanza (as catro décadas cúmprense este ano 2022 que vén de comezar) bríndanos tamén unha oportunidade para coñecer o que está por vir en materia de actividade futura e novas aventuras de inclusión e empoderamento.
O vídeo, no que se recorda o ideario orixinal de Ambar (a defensa dos dereitos e a igualdade das persoas con diversidades funcionais), inaugura un ano que, coincidindo co 40 aniversario da asociación, de seguro virá cargado de celebracións.
