20190925. A Semana de Acción polo Clima chama a unha mobilización internacional coa que acompañar a Folga Mundial contra o Cambio Climático, o 27 de setembro. A Pobra do Caramiñal súmase a esta iniciativa cunha serie de actividades que se desenvolverán ao longo da xornada do venres e que busca a implicación de toda a veciñanza. Así o deron a coñecer esta mañá a concelleira de Medio Ambiente, Genoveva Hermo, acompañada da técnica desta área, Beatriz González.
A edil manifestou que o municipio se une “porque somos un concello afectado tamén pola grave crise ambiental que está a suceder.” Entre as consecuencias do cambio climático enumerou o aumento do nivel do mar e o cambio dos ecosistemas, afirmando que “esto prexudicará non só ao mundo vexetal e animal, senón tamén a millóns de persoas.” Por todo isto, levaranse a cabo unha serie de actividades co obxectivo de chamar a atención sobre esta problemática e concienciar á poboación.
Pola súa parte, a técnica de Medio Ambiente detallou os actos que terán lugar. Así, a praia dos Areos acollerá unha cadea humana, ás 10.30 horas, aberta a todo o público “con especial atención cos centros escolares do termo municipal porque crese que é moi significativo que eles estean pendentes e sexan conscientes.” Xa pola tarde, ás 16.00 horas, procederase á recollida de lixo no río Pedras, sendo o punto de encontro a actual zona de aparcamento de Aldea Vella. Será preciso inscribirse previamente cumprimentando unha ficha de maneira presencial ou enviándoa ao enderezo electrónico medioambiente@apobra.gal. O Concello proporcionará o material necesario e contarase coa colaboración de Protección Civil e da Policía Municipal. Ademais, o Cantón de Leña será o escenario dunha concentración con lectura de manifesto, ás 20.30 horas, buscando así que a xente que traballe poida implicarse nalgunha destas accións. Deste xeito, preténdese “visibilizar un problema.”
