Baixo epígrafe común Somos iguais: Porto do Son coa igualdade e contra a violencia de xénero, o Concello de Porto do Son preparou unha completa axenda de actividades para sumarse ás celebracións do 25 de novembro, Día da Eliminación da Violencia contra a Muller. A primeira das accións previstas é a creación colectiva dos murais Somos Iguais, que están a coller corpo nos colexios das parroquias de Nebra e Xuño (CEIP Sobrado de Nebra e Xuño), incluíndo a realización de varias actividades complementarias de divulgación e concienciación co alumnado destes centros docentes.
A axenda tamén incluíu a proxección da curtametraxe As tres caídas de María Santiso, mobilizando aos estudantes de cuarto da ESO do IES do termo municipal, e a representación (o pasado 20 de novembro) da obra Invisibles, de Redrum Teatro, tamén na Casa da Cultura (unha obra para todos os públicos que pon o foco na reivindicación e visualización das mulleres que sufriron a violencia e que está abeirada á Rede Cultural da Deputación da Coruña).
O programa tamén abrangue actividades terapéuticas dirixidas a mulleres con diversidades funcionais e cognitivas (en colaboración coa Asociación Acadar) e a adhesión do Concello á campaña da Deputación da Coruña do 25-N (De fronte á violencia de xénero), incluíndo o reparto de calendarios pola igualdade, coa colaboración da entidade provincial.
Amais, o importante evento deportivo Sen-Son 10 k sumarase ás reivindicacións contra a violencia de xénero.
