O Concello e Boiro vén de dar por rematadas as actividades do Programa Integrado de Emprego (PIE) dirixido exclusivamente a mulleres no que participaron, no curso 2020-2021, un centenar de demandantes de emprego. Segundo informou o Goberno local, os obxectivos do programa “foron cumpridos de maneira satisfactoria” e “un total de 66 persoas tiveron un contrato laboral durante o desenvolvemento do curso”.
O Concello engade que o programa “superou os retos da COVID-19 e tamén os retos dixitais”, ao poder as participantes executar actividades realizadas na modalidade de teleformación combinada coa presencial. De feito, a vertente de teleformación permitiu que, aquelas persoas con cargas familiares ou outros motivos non podían participar de forma presencial, desenvolvesen con éxito as actividades de capacitación e adestramento e levalas a cabo de maneira ininterrompida malia as restricións.
En canto á formación, impartíronse dous certificados de profesionalidade de nivel I, nas que un total de 18 persoas finalizaron os certificados de Operacións Básicas de Cociña e Operacións Auxiliares de Servizos Administrativos e Xerais, de 350 e 450 horas de formación.
As alumnas participantes realizaron tamén prácticas en empresas, nas que un total de 30 alumnas aplicaron os coñecementos adquiridos en sectores como o comercio, a alimentación, hoteleira, restauración ou administración…
Os datos de emprego que acadou o programa resúmense en que 62 participantes chegaron a ter un contrato laboral durante o desenvolvemento do programa por conta allea e 4 máis por conta propia. “Con estas cifras”, explicou o Concello, “cúmprese o obxectivo do programa de acadar un 45% de inserción laboral”.
As persoas beneficiarias do programa atoparon emprego en sectores como o conserveiro, conxelados, comercio, restauración, administración…
As insercións déronse principalmente en sectores aos que se dirixiu o programa, que coinciden con aqueles que máis dificultades atopan para atopar persoal cualificado. “Estas cifras demostran que Programa Integrado de Emprego do Concello de Boiro é unha ferramenta que contribúe á mellora do nivel de empregabilidade das súas participantes, posibilitando oportunidades reais de traballo a través da formación demandada polas empresas e sectores produtivos do municipio e a comarca”, afirmou o alcalde, José Ramón Romero.
