A Mancomunidade Barbanza Arousa programa, para o mes de setembro, visitas guiadas para poñer en valor o destino turístico. Farao a través dunha axenda que inclúe o coñecemento directo (in situ) de monumentos e tesouros da nosa comarca como O Castelo da Lúa (Rianxo) o centro histórico da Pobra do Caramiñal, o Pazo de Goiáns (Boiro) ou o Dolmen de Axeitos (Ribeira). As visitas serán realizadas por unha guía oficial de Turismo de Galicia en tres linguas: galego, castelán e inglés.
Os mércores visitarase a xoia do megalitismo, o Dolmen de Axeitos en Ribeira e os xoves convídase a descubrir o señorial Pazo de Goiáns de Boiro. Asemade, os venres de setembro o protagonismo será para o casco histórico da Pobra do Caramiñal e os sábados para o Castelo da Lúa en Rianxo.
Os domingos, dende o día 12, as rutas serán variábeis comezando ese mesmo domingo no Dolmen de Axeitos e continuando o día 19 no Pazo de Goiáns, para rematar, o último domingo de mes coa visita ao centro histórica da Pobra do Caramiñal.
As visitas son gratuítas con aforo limitado e reserva de praza no correo electrónico descubre@barbanzarousa.gal.
Con esta actividade, igual ca con outras coma o recen rematado Festival Paisaxes Sonoras, a Mancomunidade continúa traballando “na posta en valor das paisaxes e recursos e afianzando o destino nos mercados potenciais así como traballando na desestacionalización”.
