Este 10 de agosto ás 18:30 horas celebrouse no Consistorio de Rianxo o acto de despedida do deportista paralímpico local Adrián Mosquera Rial. No acto de homenaxe e recoñecemento estiveron presentes o propio Adrián, o alcalde Adolfo Muíños, o concelleiro de Deportes Xusto Ordóñez e demais membros da corporación municipal.
Ademais do recoñecemento e o desexo duns futuros éxitos deportivos, o acto serviu para a sinatura dun contrato de patrocinio, entre o Concello e Adrián Mosquera, no que se vincula a imaxe e os valores que representa o deportista coa imaxe de Rianxo ante o mundo. Será, segundo informou o alcalde, “un compromiso cun ano de duración” e que “implica unhas obrigas por parte de Adrián como contrapartida ao apoio económico por parte do Concello”. Cometidos como ser a imaxe de Rianxo nos Xogos de Toquio, impartir charlas nos colexios e nos clubs da localidade e proxectar, “coa súa traxectoria deportiva e vital, uns valores desexábeis para toda persoa”.
