O Concello de Dodro achega este verán un programa de actividades ben completiño. Haberá propostas culturais e deportivas de toda índole: dende pádel, deportes alternativos e andainas polo territorio local até escolas de verán, campamentos, espectáculo de teatro e contacontos.
No plano cultural, de lecer e de actividades medioambientais, está prevista unha Andaina Nocturna, impulsada polo Concello, este sábado 26 de xuño. Ademais, ao abeiro do programa de Festival Atlántica, o día 10 de xullo actuarán Rilo e Penadique no Lavadoiro de Lestrobe, achegando o espectáculo Lavandeiras. O día 16 será a quenda de Teatro Ghazafelhos, con Monstros no camiño, na Eira de Bexo.
Vertente deportiva
O Concello de Dodro aposta forte este ano por achegar á rapazada un verán de lecer e descanso pero tamén formativo e deportivo.
Unha das actividades formativas é a Escola de Verán de Concilia Dodro 2021, que vai dirixida a nenas e nenos de 3 a 12 anos. As sesións desenvolveranse en catro quendas: do 1 ao 15 de xullo, do 16 ao 30 de xullo, do 2 ao 13 de agosto e do 16 ao 31 de agosto. O horario será de 9.30 a 13.30 horas. A Escola de Verán levarase a cabo no CPI Eusebio Lorenzo Baleirón. As prazas son limitadas.
A outra das actividades docentes son as Clases de Reforzo Educativo da ESO, que xa teñen aberto o prazo de preinscrición e que se dirixen a mozas e mozos de primeiro, segundo, terceiro e cuarto da ESO.
Polo que se refire aos deportes, organízase un Campamento de Deportes Alternativos, que se celebra (para nenas e nenos de entre 7 e 15 anos) os días 23, 25, 28, 29 e 30 de xuño, e 1 e 2 de xullo, en horario de 11 a 13 horas. Amais, o Concello tamén convocou un Campamento Deportivo de Verán, con deportes tradicionais e (tamén) galegos e todo tipo de actividades saudábeis ao aire libre. Esta actividade vai dirixida a nenas e nenos de entre 7 e 15 anos. Desenvolverase os días 5, 6, 7, 8, 9, 12, 13, 14, 15 e 16 de xullo.
