A conselleira de Vivenda e Planificación de Infraestruturas, María M. Allegue, percorreu un treito da autovía de Barbanza (AG-11) ao seu paso por Dodro. Fíxoo na mañá deste domingo 22 de novembro.

O motivo desta visita foi comprobar o avance dos traballos de reforzo e acondicionamento de firme que se están a realizar en todo o trazado desta autoestrada entre Padrón e Ribeira.
As obras de mellora e reforzo do firme da Autovía do Barbanza (AG-11) están actualmente en execución ao longo dos seus máis de 40 quilómetros entre Padrón e Ribeira, cun investimento superior aos 10,5 millóns de euros por parte da Xunta de Galicia.
A intervención abrangue a totalidade do trazado da AG-11 (algo máis de 40 km), incluíndo tanto o tronco principal como os enlaces entre Padrón e Ribeira.
O contrato foi adxudicado á construtora ourensá Copasa por arredor de 10,5 millóns de euros (cun orzamento global da actuación que rolda os 11,9 millóns).
Os traballos inclúen a rehabilitación superficial e o estendido dunha nova capa de rodaxe, a renovación das xuntas de dilatación nas estruturas, a mellora do balizamento e o repintado da sinalización horizontal.




