O novo músico ribeirense Juan Grela Docabo ofrecerá este mércores 2 de xuño, no Conservatorio Municipal Enrique Paisal, o seu recital de fin de grao profesional na especialidade de gaita.
A actividade terá lugar no salón de actos ás 19.30 horas. O programa que o músico vai interpretar consta do seguinte repertorio: L’Art de preluder de Jacques M. Hotteterre, Sonata I para gaita e baixo continuo op.27 de J. Bodin de Boismortier, Sonata III para gaita e baixo continuo op.2 de Charles Buterne e Suite en sol m de Daniel Demoivre.
O músico
Juan Grela Docabo comezou os seus estudos de gaita no conservatorio local aos 8 anos, abordando un repertorio histórico do instrumento dende a Idade Media ata a época contemporánea. De xeito paralelo, con 11 anos, accede á especialidade de clarinete, instrumento no que cursa actualmente grao profesional
Ten recibido aulas de gaita de diversos mestres como Paulo Gonçálvez, David Vellas e Ánxela Vidal. Na faceta máis popular do instrumento fórmase con gaiteiros como Pepe Romero, Suso Vaamonde, José Manuel López “Josele” ou Daniel Bellón. Tamén asiste a un curso formativo con Cristian Silva e participa, con 10 anos, no concurso infantil de TVG Vai de gaita.
Formou parte de varias asociacións de música tradicional, como Tahume e Fanfarria Ferruxa, así como na banda do Ateneo Musical da Pobra.
