O venres 28 o Auditorio de Rianxo vai dar acollida a un concerto clásico a cargo da pianista armenia Anna Sarkisova. A cita será ás 20.30 horas, na Sala Arcos Moldes. Segundo confirmou o Concello, a entrada será de balde, e só se poderá acudir con reserva previa, que é posíbel facer até o 27 de maio a través da web do Concello ou no teléfono 981 100 688.
Anna Sarkisova é unha pianista clásica recoñecida internacionalmente, tanto pola súa técnica e musicalidade como pola súa capacidade para conectar co público. Ten tocado en países de todo mundo e foi gañadora de importantes premios e recoñecementos internacionais, amais de ter traballado con músicos do talle de Rudolf Kehrer, Oxana Yablonskaya, Oleg Meisenberg, Leonid Brumberg ou Alexander Braginsky, entre outros. Actualmente viven en Los Ángeles.
Doutorada en Artes Musicais pola Escola de Música Thornton – Universidade do Sur de California (USC), na actualidade Anna está traballando no seu novo álbum que incluirá pezas de compositores de Europa Occidental e Armenia.
A pianista reside habitualmente en Los Ángeles (California) mais atópase pasando unha tempada en Galicia onde ten previsto a realización de varios concertos, incluído o Náutico de Portosín o pasado 10 de abril, entre outros emprazamentos (Paraninfo da USC, Auditorio de Vilagarcía, Ponteareas, Redondela).
O programa inclúe a interpretación de pezas de Liszt, Rachmaninoff, Babajanyan e Solar.
Esta proposta enmárcase no Programa de Música de Cámara-IV Ciclo Novos Intérpretes da EMR e o Concello de Rianxo 2021.
