O Boletín Oficial da Provincia vén de publicar a concesión provisional das axudas promovidas pola Deputación da Coruña para a contratación de persoal técnico deportivo nos concellos da provincia cun total de 905.000 euros. Desta vez, serán sesenta e nove os municipio que que se beneficiarán deste apoio económico, entre os cales se atopan A Pobra, Boiro, Lousame, Porto do Son, Rianxo, Ribeira e Dodro.
A Deputación financia ata o 80% dos custes salariais do persoal técnico deportivo contratado durante un ano. As axudas son dun máximo de 15.000 euros para aqueles municipios que opten pola contratación dun graduado universitario en Ciencias da Actividade Física e o Deporte, é o caso da Pobra, Boiro, Lousame, Rianxo, Ribeira e Dodro.
Os concellos que decidan contratar tamén técnicos superiores en Animación de Actividades Físicas e Deportivas recibirán unha achega de 10.000 euros, como é o caso Porto do Son.
A deputada responsábel da área de Deportes, Cristina Capelán, destacou que estas axudas “ademais de contribuír á xeración de emprego na provincia, facilitan tamén que os municipios poidan desenvolver programación deportivas de carácter estábel e fomentar a actividade física entre a poboación”.
