A Asociación de Empresarios de Ribeira reuniuse o pasado venres, con motivo da inauguración da Feira de de Inverno do Pequeno Comercio, na praza do Concello, co deputado provincial José Blas García Piñeiro, e co secretario xeral da agrupación socialista en Ribeira, José Manuel Vilas. Na xuntanza mantida, ambos comprometéronse a trasladar ao presidente da Deputación da Coruña, Valentín González, as inquietudes e demandas dos integrantes da asociación no relativo á ampliación da estrada que discorre polo lugar da Carballa en relación a Moldes, que sería unha das vías principais de acceso ao futuro complexo industrial co que contarían os empresarios de Ribeira.
Os empresarios, segundo destacou a asociación, adquiriron o compromiso dunha vindeira xuntanza co responsábel de vías e obras pertencente á entidade provincial. Na reunión, que se formalizará o máis axiña posíbel, trataríanse máis en profundidade os trámites precisos para iniciar a ampliación da dita estrada.
