A Asociación Amicos, con sedes en Comoxo (Boiro) e Oleiros (Ribeira) acolleu hoxe nas súas dependencias a aplicación da segunda dose da vacina anti-COVID á comunidade de residentes e traballadores da entidade. Macarena, Pablo, Jesús foron os primeiros en recibila a primeira hora deste 2 de febreiro, uníndose axiña as súas compañeiras e compañeiros e as técnicas e técnicos do Centro Integral Amicos.
En total, estamos a falar de 120 persoas protexidas xa contra a COVID-19 (de feito, a efectividade das vacinas de Pfizer é do 90%, o que non exime de seguir mantendo as medidas de hixiene, seguridade e EPIS para conseguir a máxima inmunidade).
Segundo manifestaron, “recibimos esta segunda dose con esperanza, xa que vemos máis preto a volta á normalidade”.
A dirección do centro fixo saber que os prazos impostos de 21 días despois da primeira toma “cumpríronse como se agardaba”.
Tamén explicaron que en Amicos “estamos moi concienciados desde abril do ano pasado no que houbo un gromo de máis de 30 afectados. Desde entón, non volvemos a rexistrar ningún caso. Todas as semanas realízanse cribados para ter cotexada a situación do centro”.
