Se ben rematou, propiamente dito, o ciclo Verán Cultural do Concello de Boiro, as actividades de toda índole (diversas, descentralizadas, creativas e seguras) van ter continuidade este outono. Esta fin de semana, sen ir máis lonxe, imos ter teatro e maxia para crianzas e familias. Hoxe 2 de outubro a Casa da Cultura vai acoller o espectáculo Lambetadas, a partir das 20.00 horas. Trátase dunha peza de teatro para público infantil e familiar a cargo da compañía Talía Teatro.
Lambetadas ten como obxectivo a concienciación e posta en valor da lingua propia como elemento fundamental da identidade individual.
O Concello explica que o aforo deste espectáculo é, como vén sendo costume dende que se iniciou a alarma da COVID, limitado. As entradas poden conseguirse o propio día da función, a partir das 16.30 horas, na Casa da Cultura.
O sábado a maxina será protagonista da man do Mago Tego, que estará na Casa da Cultura de Boiro a partir das 12.00 horas. Será unha actividade para público infantil e familiar, maiores de 7 anos. O obxectivo do espectáculo é espertar o interese pola arte da maxia na xente. O aforo é novamente limitado e as entradas poden reservarse na propia biblioteca ou no número de teléfono 981 84 84 10.
