
Ribeira segue desfrutando de diferentes disciplinas artísticas ao abeiro do Outono Cultural, polo que o Centro Culturas Lustres Rivas acollerá unha nova exposición: Madeiras do Mar, de Ruth Beltrán.
A apertura será este venres 20 de novembro, ás 20.00 horas, na propia instalación municipal.
Esta mostra itinerante forma parte de Madeira Zombi; un proxecto co que a autora combina fotografía, artesanía e etnografía transferindo imaxes a madeiras arruinadas e abandonadas para dotalas dunha nova vida, converxendo así o relato da propia instantánea e a do pasado do soporte. Deste xeito, as madeiras volven á vida cargadas de novos significados.
A tradición mariñeira non se constata só no que amosan as fotografías, senón tamén en que tódalas madeiras foron recollidas nas praias e nas rochas. En Ribeira amosaranse medio cento de obras e algunhas das pezas recordan a traxedia do Santa Isabel e o pasado da illa de Sálvora.
O Outono Cultural continúa ata principios de decembro coa celebración de Santa Icía (concerto de A Misela de Noia no 21 de novembro, ás 20.00 horas, no Auditorio municipal; e concerto da Coral Polifónica Municipal de Ribeira no 22 de novembro, ás 13.15 horas, na igrexa de Palmeira); o II Ciclo de Contadas de Humor en colaboración coa Asociación Francisco Lorenzo Mariño (con Contos de defuntos (e outros asuntos), da man de Brais das Hortas, no 21 de novembro, ás 20.00 horas; e con Murmuraban as miñas veciñas, de Dani Blanco, no 28 de novembro, ás 20.00 horas; todas elas na Casa do Mar de Aguiño); e o festival Charity Christmas de Kids&Us a favor da Fundación Andrea no 6 de decembro, ás 19.00 horas, no Auditorio Municipal.



