O Concello de Boiro vai executar obras de pavimentado en diversos núcleos do termo municipal por un importe de 1.104.713,31 euros. As actuacións vanse levar a cabo con medios propios e licitaranse durante o último trimestre do ano.
Inclúense actuacións para a renovación en varias rúas do núcleo urbano de Boiro, por importe de 496.769,37 euros. Este proxecto contempla o asfaltado da avenida da Constitución, dente a rotonda da avenida de Compostela ata a rotonda de Espiñeira; tamén contempla o pavimentado dun tramo da rúa Norberto Pijuán con Vimieiro; un tramo da rúa Estatuto de Galicia e a rúa Dereitos Humanos; e unha vía en Boiro de Arriba.
Tamén no núcleo de Boiro levarase a cabo un proxecto dun importe de 109.520,42 euros na que se contempla o asfaltado dunha estrada da zona da escola unitaria e centro médico do Saltiño; o Camiño Real; a rúa Breiro no tramo comprendido entre a AC-305 e a av. da Constitución; e a zona da rotonda da Mancomunidade e a rúa Salvador Allende.
Contemplase tamén a renovación do pavimento e mellora de recollida de pluviais na Agra Vella en Cabo de Cruz, unha obra dun importe de 118.595,57 euros. Trátase dunha actuación mediante a que se vai actuar na mellora da rede de recollida de pluviais e a renovación da capa de rodadura asfáltica, que se completará con sinalización horizontal.
Vaise executar un pavimento en Lampón, na estrada que vai de Peralto ao Porto e na rúa Padre Joseba Beobide, por un importe de 77.448,99 euros. “Trátase de dúas estradas que, na actualidade, presentan un avanzado estado de deterioro agravado polas choivas deste inverno”, informou o Concello, que tamén inclúe neste programa a renovación do pavimento en Abanqueiro no acceso á Aldea Vella dende a DP1101, unha actuación de 98.472,33 euros. Neste proxecto vanse executar os traballos previos de limpeza para a reposición do pavimento asfáltico, a posta a cota dos rexistros existentes e finalizar coa sinalización horizontal.
Proxéctase tamén a execución do asfaltado da vía de Berres ata o Saltiño, unha actuación dun importe de 103.519,46 euros coa que se vai solventar “o gran deterioro do firme con zonas desgastadas que fai que perda as condicións axeitadas de rodadura”, informou o Concello, engadindo que se trata “dunha vía que discorre maioritariamente por solo rústico e que presta servizo a un pequeno ámbito residencial”.
Está previsto tamén o pavimentado da pista municipal do depósito a Espiñeira, unha actuación de 100.387,17 euros para arranxar unha pista pública que da acceso ao depósito municipal de auga que presenta un avanzado estado de deterioro.
Algunhas destas obras están xa publicadas na Plataforma de Contratos do Sector Público para que as empresas interesadas poidan presentar as súas ofertas.
