Comeza o outono ás 02,05 e a estabilidade meteorolóxica continuará a ser a gran protagonista deste mércores 23, San Lino. As Rías Baixas vivirán un día de marcada influencia marítima. Aínda que o sol dominará o ceo durante o groso da xornada, a previsión meteorolóxica advirte da entrada de brétemas costeiras tanto nas primeiras como nas últimas horas do día, un fenómeno habitual nestas condicións que poderá reducir temporalmente a visibilidade na liña de costa.
Na contorna de Santiago de Compostela e as súas comarcas agárdanse ceos practicamente despexados ou con presenza ocasional de nubes altas que non impedirán o paso da luz solar, malia a posibilidade de que se forme algún banco de néboa matinal illado a primeiras horas nos vales interiores. Os termómetros rexistrarán un lixeiro descenso respecto a xornadas precedentes, mantendo con todo valores moi agradables e ambiente suave durante a tarde.(máximas de 30-32 graos)
En canto ao réxime de ventos, soprarán frouxos e de dirección variable nas Rías Baixas e no interior coruñés, aínda que con predominio da compoñente nordés, contrastando coa situación máis axitada do litoral norte galego, onde se agardan refachos máis intensos.
O noso mar: Vento variable á mañá, do noroeste á tarde e do oeste á noite, forza 1 a 3 á mañá e á noite e 1 a 2 á tarde. Mar ovellado á mañá e á noite e mar rizado á tarde. Visibilidade boa. Mar de fondo do noroeste, con ondas de 1.5 a 2.5 metros á mañá e 1 a 2 metros á tarde e á noite.
