O Cine París de Muros acolleu este sábado a presentación da exposición Sinaladas. A loita das mulleres no século XX: cen anos de conquistas e represión, unha mostra que nos achega ás historias de mulleres que loitaron, avanzaron, abriron camiños e tamén sufriron a represión e o silencio.
Durante o acto contouse coa presenza da investigadora Montse Fajardo Pérez, que acompañou a inauguración cunha charla, e coa deputada de Igualdade da Deputación da Coruña, Sol Agra.
A alcaldesa de Muros, María Lago, afirmou que “é unha honra que Muros sexa o lugar escollido para inaugurar esta exposición. Queremos agradecer á Deputación da Coruña que conte connosco para traer ata aquí estas historias, porque coñecer o que viviron e polo que loitaron as mulleres que nos precederon é tamén coñecer a nosa propia historia.”
Maruxa Martínez, concelleira de Muller, sinalou que “hai que por o foco na necesidade de darlles nome, voz e espazo ás mulleres que durante tanto tempo quedaron fóra dos relatos oficiais, hai que lembrar que moitos dos dereitos e liberdades actuais teñen detrás anos de loita e esforzo”, e engade, “as historias das Sinaladas son memoria colectiva. Son historias de mulleres concretas, pero tamén son parte da historia que construímos como sociedade. Lembralas, coñecelas e poñelas no lugar que merecen é unha responsabilidade colectiva”.
A exposición poderase ver no Cine París de luns a venres ata o 28 de setembro incluído, en horario de 10h a 14h.
A mostra propón unha andaina pola loita que as galegas, e nomeadamente as mulleres da provincia da Coruña, emprenderon durante cen anos: desde o agrarismo de finais do século XIX ata o papel xogado no proceso de transición iniciado tras a morte do ditador Francisco Franco. Formada por 39 paneis, a mostra está dividida en tres grandes bloques, que a trazo groso se corresponderían co tempo anterior ao golpe de Estado, o período que vai deste ao fin da guerrilla, e o da loita en prol da recuperación das liberdades democráticas.
Sinaladas ten por obxecto dar a coñecer a centos de mulleres, que malia o sinaladas (destacadas) que eran, ficaron descoñecidas logo de ser sinaladas (perseguidas) pola intransixencia, non só franquista, que as relegou a un esquecemento do que esta mostra as quere quitar.
