A Deputación da Coruña sumouse aos actos de conmemoración do Día Internacional dos Arquivos, este 9 de xuño, e fíxoo divulgando a través das súas redes sociais e da web do Arquivo Provincial algúns dos documentos máis interesantes e curiosos que atesoura entre os seus fondos orixinais, comentados pola historiadora e directora do Arquivo Provincial, Carmen Molina. O proceso de liberación acompáñase do cancelo #OarquivoDaNosaHistoria.
Entre os documentos compartidos en datas recentes, a Deputación salienta o proxecto de cárcere para a cidade de Betanzos, elaborado polo arquitecto provincial Faustino Domínguez en 1865 (PDF), ou as cartas manuscritas por Juana de Vega tras a epidemia de cólera que asolagou a cidade da Coruña en 1853 (PDF). O próximo documento liberado adicarase á figura de Santiago Casares Quiroga, coruñés presidente do Goberno da República en 1936.
O Arquivo Provincial traballa na dixitalización dos seus fondos, co obxecto de “garantir a súa conservación e de facelos accesíbeis a un público cada vez máis amplo”. Entre os documentos xa adaptados aos novos formatos están todas as actas das sesión dos plenos da Deputación da Coruña. Este ano, ademais, dixitalizarase o Boletín Oficial da Provincia e diversa documentación relativa ao patrimonio provincial.
