A Xunta de Galicia licitou por un importe inicial de 250.173,07 euros (IVE incluído) as obras de construción dunha nova estación depuradora de augas residuais (EDAR) no núcleo de Sorribas, pertencente ao concello de Rois. Esta infraestrutura substituirá o actual sistema de depuración, cuxo funcionamento resultaba deficiente.
A nova instalación está deseñada para dar servizo a 46 habitantes con horizonte temporal no ano 2044 e contará cos seguintes elementos técnicos:
- Sistema de depuración: Pretratamento, fosa séptica soterrada e un humidal de fluxo subsuperficial.
- Rede de condución: Execución de dous novos colectores con cadanseus pozos de rexistro (un para conducir as augas residuais á EDAR e outro para levar as augas tratadas ata o punto de vertedura).
Prazos e financiamento
As empresas interesadas teñen de prazo ata o vindeiro 18 de setembro para presentar as súas ofertas. Tras a adxudicación, o prazo de execución dos traballos será de catro meses.
A actuación articúlase a través dun convenio entre Augas de Galicia (Consellería de Medio Ambiente e Cambio Climático) e o Concello de Rois:
- Financiamento local e autonómico: A Xunta achegará o 80% do orzamento e o Concello o 20% restante.
- Fondos europeos: O proxecto conta con cofinanciamento do Fondo Europeo Agrícola de Desenvolvemento Rural (FEADER) nun 60% do gasto elixible, dentro do Plan Estratéxico da PAC 2023-2027 (PEPAC).
Esta intervención forma parte do plan de Augas de Galicia para reforzar os servizos hidráulicos no rural galego, un paquete que abrangue preto de trinta actuacións cun investimento global estimado de case 28 millóns de euros.
