A Asociación Boirense de Empresarios segue adiante este mes de xuño coa súa loita incansábel a prol do comercio de proximidade e as vantaxes de investir e mercar a un paso da nosa casa. Seguindo este compromiso, a ABE pasou a integrarse na iniciativa autonómica Compra do Noso, que xurdiu, en plena crise económica e sanitaria, para fomentar o consumo de produtos e servizos da nosa terra co fin de contribuír a reactivar a economía e o emprego.
A iniciativa arrincou co apoio de 22 entidades empresariais (confederacións de empresarios galegas, clústeres, cámaras e asociacións) ás que se veñen de sumar, como dixemos, a Asociación Boirense de Empresarios e o seu Centro Comercial Aberto galardoado por dúas veces nos premios nacionais do sector.
A ABE vai facer súa esta marca, e a súa filosofía usándoa en todas as comunicacións externas e internas. Tamén a vai poñer a disposición dos 200 asociados da entidade para que a poidan usar no seu día a día e actuar como prescriptores da mesma convidando a outras entidades coas que colabora a entidade boirense a que usen a marca de maneira cen por cen gratuíta.
