O Concello de Muros celebra desde a mañá deste venres 10 de xullo e a ata o domingo 12 pola noite as XXI Xornadas Mariñeiras Muros Mira ao Mar, este ano baixo o lema Un mar de fala.
Milleiros de persoas visitarán Muros para pasear polo mercado mariñeiro e participar nos concursos, obradoiros, a programación infantil e as visitas guiadas. A gastronomía local é tamén protagonista, así como a música e as exposicións.
O programa pódese consultar ao detalle na web municipal.
Na inauguración das xornadas participaron a alcaldesa de Muros, María Lago; a concelleira de Cultura e Turismo, Caridad González, e a concelleira de Promoción Económica, Laura Rivadeneira.
María Lago destacou que este evento “trae tres xornadas festivas para reivindicar con orgullo quen somos e de onde vimos”, asegurando que “toda a veciñanza de Muros leva o salitre dentro e é un motivo de gran ledicia ver como estas xornadas son xa un referente, con milleiros de persoas que nos visitan”.
A alcaldesa agradeceu “o traballo e o esforzo de todo o persoal do concello, que moitas veces non se ve pero é imprescindíbel para celebrar con éxito un evento como este”.
Caridad González puxo en valor “a implicación de todo o tecido asociativo e da veciñanza para poñer en marcha Muros Mira ao Mar, neste ano cunha decoración moi especial polas rúas de Muros”.
En palabras de Laura Rivadeneira, “o que fai diferente a Muros é tamén o que lle da tanto valor. O mar é traballo e tamén son palabras e memoria. O mar creou as súas propias palabras e temos que conservar esta riqueza da nosa fala”, mostrando un agradecemento especial “ao persoal da Brigada de Obras polo seu traballo nestes días”.
Tras a inauguración oficial co Orfeón Ría de Muros, celebrouse o faladoiro Un mar de fala, un encontro que puxo en valor dunha forma moi amena a riqueza da lingua galega vencellada ao mar, as expresións, palabras e xeitos de falar propios da tradición mariñeira que forman parte do patrimonio cultural e inmaterial de Muros.
No faladoiro participaron Henrique Monteagudo, presidente da Real Academia Galega (RAG), e Vicente Brea “Chente”, mariñeiro muradán, que compartiron a súa visión sobre a importancia de conservar este legado lingüístico.
A música volverá ser unha das grandes protagonistas de Muros Mira ao Mar. Durante tres días, o Curro da Praza acollerá unha programación que reunirá algunhas das propostas máis destacadas da música galega actual e da tradición popular. Esta noite, Sés; mañá sábado, Tona, e o domingo o Festival Folclórico coa AF Ximiela (Muros), AC Rosalía de Castro (Teo) e Amendoeiras em Flor (Portugal).
As xornadas ofrecerán tamén unha ampla programación de obradoiros e actividades para público familiar, pensadas para achegar a cultura mariñeira e os oficios tradicionais aos máis pequenos e ás súas familias.
