O Grupo Municipal Socialista de Ribeira levará ao pleno da Corporación unha proposición para reclamar ao Goberno local que “acometa os arranxos máis urxentes no Centro Social de Oleiros e reserve os fondos necesarios para a súa reforma integral”. No comunicado os socialistas din que “o edificio público continúa nun evidente estado de deterioración, malia que en setembro de 2025 o propio Partido Popular, daquela na oposición, presentara unha proposta para demandar actuacións neste equipamento”. Neste senso, o portavoz socialista, Francisco Suárez-Puerta, criticou que “o que o PP consideraba urxente cando estaba na oposición converteuse agora nun asunto esquecido. Antes reclamaba respostas, pero desde que chegou á alcaldía non tomou ningunha medida”, sinalou, apuntando que “o Centro Social de Oleiros presenta cristais danados, carpinterías metálicas oxidadas, portas deterioradas, pintadas, humidades, suciedade acumulada, pavimentos raiados e paneis afectados pola humidade; e a contorna exterior tamén conta con maleza e zonas claramente desatendidas”. Para o PSOE, “esta situación ofrece unha imaxe de abandono impropia dun equipamento público ao servizo da veciñanza da parroquia”.
Suárez-Puerta advertiu “que o Orzamento municipal deste ano evidencia que o Goberno non prevé realizar unha intervención integral no edificio” e que “as contas recollen 12.000 euros para equipamento de cultura, 40.000 euros para estudos e traballos técnicos e 30.000 euros para a conservación de edificios culturais”.
“É evidente que destas partidas non pode saír unha reforma integral do Centro Social de Oleiros. O goberno non reservou os recursos necesarios nin definiu unha actuación concreta para solucionar o problema”, afirmou.
O portavoz socialista insistiu en que “a ausencia dunha partida para unha reforma completa non pode empregarse como escusa para manter o edificio nesta situación”. E engadiu: “Aínda que a reparación integral non se poida executar de inmediato, poden acometerse actuacións urxentes, como substituír os cristais, revisar portas e xanelas, solucionar as humidades, limpar o edificio e acondicionar os accesos”.
Por este motivo, o PSOE propón que o Concello inclúa unha partida específica para a reforma do Centro Social de Oleiros no orzamento municipal de 2027 ou que incorpore a actuación ao próximo POS+ da Deputación da Coruña.
Os socialistas propoñen seguir o mesmo criterio aplicado na Casa da Cultura de Carreira, onde esta vía permitiu mobilizar un investimento de 121.000 euros.
