Juan Caballero (texto e imaxes). O Club Náutico e Deportivo de Ribeira engalánase en homenaxe ao seu presidente de honra, Ramiro Carregal Rey, na que é a maior festa da vela na comunidade galega, a Regata FRINSA, que este sábado 27 de xuño largará amarras para navegar un trazado costeiro polo interior da ría de Arousa.
Á gran cita velística sumáronse as mellores unidades da frota das Rías Baixas e as súas comarcas, con nomes tan relevantes como o Corsario Thunder, de Jorge Durán, do Club de Iates de Vilagarcía, que co seu TP52 ofrecerá un gran espectáculo visual e deportivo. O Siradella, de César Álvarez e Francisco Gude, do Real de Portosín, un dos veleiros cunha gran colección de triunfos nas súas vitrinas; o Bon III, de Víctor Carrión, do Club Náutico Punta Lagoa, vixente campión do Gran Trofeo Faro de Corrubedo, disputado a semana pasada; o Cámping Ría de Arousa, de José Manuel Pombar, do Club Náutico Arousa Norte; o Peperetes-Nortemar, de José Manuel Millán, do Real Club de Regatas de Galicia; o Ziralla Primeiro, de Ramón Barreiro, do Real Club Náutico de Sanxenxo; o Moucho, de Daniel Ayaso, do club anfitrión de Ribeira; o Exit Manitú, de Emilio Lago, do Liceo Marítimo de Bouzas; o Orión, de Javier Pérez, do Monte Real Club de Iates de Baiona, grímpola que tamén defende o Unus, de Luis García Trigo; ou La Gitana, de José Ángel Quintero, do Real Club Náutico da Coruña, entre outros moitos veleiros, entre os que tamén destaca o mítico Arousa VI, de José Luis Torres Colomer, do presidente do Náutico de Ribeira, José Luis Torres Colomer.
O trazado, que será un percorrido costeiro, roldará as 8-12 millas pola ría de Arousa, numeral que se elixirá entre a vintena que figuran nas Instrucións de regata e que será definido no último momento ao estar supeditado ás condicións meteorolóxicas.
A saída está programada ás 12 do mediodía, sendo a hora límite o 15.30 h. Os veleiros serán clasificados na súa categoría natural de Regata, Cruceiro-Regata e Cruceiro, segundo o seu GPH ou corte, para facer unha competición máis igualada. A entrega de premios celebrarase ao termo da regata.
Peperetes Nortemar, Orión e Bacor foron os vencedores, nas súas respectivas categorías, da edición da FRINSA de 2024, xesta que tentarán repetir, aínda cando hai na listaxe de rexistrados serios candidatos.
