Este luns 22 de xuño o Concello de Noia procedeu á retirada do mural situado na rúa Rodríguez Cadarso, en pleno centro histórico da vila.
Esta actuación realízase en cumprimento das indicacións trasladadas pola Dirección Xeral de Patrimonio, que trasladou ao Concello a necesidade de retiralo, xa que o seu pintado non contou nunca con ningunha das autorizacións necesarias.
Cómpre lembrar que o centro histórico de Noia conta cun réxime especial de protección, polo que calquera actuación que altere a imaxe exterior dos inmóbeis “debe contar cos informes e autorizacións correspondentes da administración competente”.
A actuación do Concello responde aos requirimentos realizados no marco da normativa vixente e “co obxectivo de garantir o cumprimento das obrigas derivadas da protección do noso patrimonio histórico e cultural”, engadiron fontes do Consistorio.
