O salón de actos do Auditorio Municipal de Rianxo vai dar acollida este venres 12 de xuño á presentación libro O mapa da túa sexualidade, da autora Laura Veiga.
A cita, de entrada libre, será ás 17.30 horas. Incluirá ás 18.00 horas un obradoiro de balde de AdolescenTEA para rapazada de 10 a 13 anos.
Na presentación participarán Milagros Torrado, secretaria da asociación BarbanTEA, Julio Alcalde, concelleiro de Cultura, e Laura Veiga, autora do libro.
O taller será impartido pola propia Laura Veiga, xornalista, sexóloga, divulgadora e muller autista.
A entrada será libre até completar o aforo.
O acto vén de man de BarbanTEA coa colaboración da Asociación Cultural Barbantia, CaixaBank, Xerais e o Concello de Rianxo.
O libro
O mapa da túa sexualidade é un libro de Laura Veiga ilustrado por María Montes Sueiro.
Editado por Xerais, trátase dunha “guía ilustrada clara, divertida e coidada para comprender como funcionamos por dentro e por fóra”.
Sinopse
Sabías que a túa sexualidade é como un mapa que se vai debuxando a medida que medras? Un mapa cheo de camiños, preguntas, emocións e descubrimentos que te axudan a entender quen es e como te relacionas co mundo. Neste libro atoparemos unha guía clara, divertida e coidada para comprendermos como funcionamos por dentro e por fóra: o corpo que medra, os sentimentos que ás veces enredan, o xénero, o desexo, a orientación sexual… e moito máis!
A autora
Laura Veiga (Gondomar, 1997) é xornalista, sexóloga e divulgadora científica. En 2020 puxo en marcha Pingando, un proxecto dedicado á divulgación menstrual e á educación sexual en redes sociais. Imparte obradoiros para crianzas, adolescentes, familias e profesorado en centros educativos, creando espazos seguros onde preguntar, aprender e desaprender. Participou en diferentes encontros de divulgación con charlas como Máis diversidade, mellores resultados, Un percorrido polo tabú menstrual ou Vampiresas, histéricas e feas. En 2022 recibiu o Premio Pioneiro no certame Youtubeiras polo seu labor divulgador.
